គួរបញ្ជាក់ផងដែរថា រដ្ឋាភិបាលនៃព្រះរាជាណាចក្រកម្ពុជា តាមរយៈអាជ្ញាធរខេត្តព្រះសីហនុ និងក្រសួងសេដ្ឋកិច្ច និងហិរញ្ញវត្ថុ បាននឹងកំពុងដំណើរការអភិវឌ្ឍន៍គម្រោងចំណតរថយន្តឆ្លាតវៃនៅខេត្តព្រះសីហនុ ក្រោមយន្តការភាពជាដៃគូរវាងរដ្ឋ និងឯកជន (PPP)។ គម្រោងនេះមានគោលបំណងដើម្បីផ្តល់ជូននូវដំណោះស្រាយចំណតរថយន្តដែលមានភាពងាយស្រួល មានសុវត្ថិភាព និងទំនើប ដើម្បីបំពេញតម្រូវការកើនឡើងរបស់ប្រជាពលរដ្ឋ និងភ្ញៀវទេសចរនៅក្នុងក្រុងខេត្តព្រះសីហនុ។

គម្រោងនេះបានបញ្ចប់ដោយជោគជ័យនូវដំណាក់កាលសិក្សាដែលអាចអនុវត្តបាន ហើយបច្ចុប្បន្ននេះកំពុងដំណើរការឆ្ពោះទៅរកការដេញថ្លៃប្រកួតប្រជែង ដើម្បីជ្រើសរើសដៃគូឯកជនដែលមានសមត្ថភាពគ្រប់គ្រាន់ក្នុងការដំណើរការគម្រោង។

តាមរយៈសិក្ខាសាលាផ្សព្វផ្សាយនេះក៏មានការធ្វើបទបង្ហាញអំពីប្រធានបទសំខាន់ៗរួមមាន៖

១. ទីក្រុងឆ្លាតវៃ និងបរិយាកាសនៃការវិនិយោគក្នុងខេត្តព្រះសីហនុ

២. ក្របខណ្ឌគ្រប់គ្រងគម្រោង PPP និងការរៀបចំអភិវឌ្ឍនគម្រោងចំណតឆ្លាតវៃក្រុងព្រះសីហនុ

៣. វីដេអូបង្ហាញអំពីគម្រោងចំណតឆ្លាតវៃ និង

៤.លទ្ធផលនៃការសិក្សាគម្រោងចំណតឆ្លាតវៃខេត្តព្រះសីហនុ។

សិក្ខាសាលាផ្សព្វផ្សាយនេះក៏មានការចូលរួមផងដែរពីសំណាក់តំណាងមន្ត្រីពាក់ព័ន្ធនៃក្រសួងសេដ្ឋកិច្ច និងហិរញ្ញវត្ថុ តំណាងក្រុមហ៊ុន សមាគមធុរកិច្ចឯកជន និងវិនិយោគិនពាក់ព័ន្ធជាច្រើនទៀតផងដែរ។